Да такой высновы прыйшлі прадстаўнікі міністэрстваў гандлю і адукацыі, "Беллегпрама" і Белкаапсаюза, наведваючы гандлёвыя кропкі ў Мінску і Стоўбцах. Чыноўнікі пагутарылі з прадаўцамі і вытворцамі і пацікавіліся, чаго не хапае пакупнікам.
У сталічным ГУМе выбар паўсядзённага школьнага адзення і канцылярскіх тавараў сапраўды ўражвае. Сотні мадэляў школьнай формы ад беларускіх вытворцаў, дзясяткі варыяцый камбінавання строяў для хлопчыкаў і дзяўчат. А ад каляровай гамы хлапчуковых кашуль літаральна ў вачах мігціць. Не дзіва, што нават раніцай буднага дня тут назіраецца наплыў пакупнікоў.
Сярод іх заўважаю бабулю, маці і дзяўчынку-школьніцу, якія з цікавасцю выбіраюць дзявочыя кашулі. Сям'я прыехала сюды па справах з Рагачова, прычым яны да школы ўжо закупіліся дома. Па іх словах, асартымент тут не значна адрозніваецца ад мясцовага, ды і цэны — таксама.
Між тым, супрацоўнікі ГУМа адзначаюць, што, нягледзячы на шырокі выбар, часам падабраць строй для школьніка бывае складана.
— Дзеці цяпер розныя. Бываюць поўненькія і нізкія, бываюць худзенькія і высокія. Але пры неабходнасці мы падганяем адзенне пад дзіця.
Намеснік міністра адукацыі Васіль Будкевіч
заўважыў, што трэба пашырыць памерную лінейку мадэляў школьнага адзення. Вучні старэйшых класаў — ужо дарослыя юнакі і дзяўчаты, і ў дзіцячых аддзелах ім праблематычна падабраць сабе адзенне. Памерны максімум тут — 44 — 46, у хлопчыкаў — 48.
Таксама чыноўнікі звярнулі ўвагу, што дзелавы стыль адзення хоць і строгі, але павінен быць сучасным і модным. Ды і апроч навучальнага працэсу, у школах ладзяцца святы і культурныя мерапрыемствы, на якіх хочацца выглядаць урачыста. У адказ на гэта супрацоўнікі ўнівермага сярод безлічы чорна-шэрых пінжакоў і штаноў знайшлі... адзін белы касцюм.
На 14-й спецыялізаванай выставе-кірмашы "Прывітанне, школа!", што адкрылася ў нацыянальным выставачным цэнтры "БелЭкспа", можна знайсці і імпартнае, і нават дызайнерскае адзенне для школьнікаў. Набыць неабходныя рэчы на выставе магчыма да 31 жніўня.
— Тут зручна выбіраць: усё ў адным месцы. Шмат павільёнаў, але мы знайшлі тое, што хацелі, — дзеліцца са мной настаўніца Святлана Мікалаеўна, паказваючы на ўнучку Кацярыну, якая красуецца ў новым школьным строі. — Цэны, безумоўна, розныя. Але мы падабралі касцюм за 190 тысяч, гольфік за 46 тысяч — гэта ж зусім не дорага.
Калі дэлегацыя чыноўнікаў і журналістаў знаёмілася з асартыментам аднаго з павільёнаў кірмашу, нечакана да яе падышла жанчына. Яна паведаміла, што сваіх шасцярых унукаў заўжды апранае на гэтай выставе і менавіта ў гэтым павільёне. Але выказала заўвагу, што ў школьным адзенні няма натуральных тканін, а калі і ёсць — цяжка знайсці рэч патрэбнага памеру. У адказ на такую заяву вытворцы прапанавалі аформіць індывідуальную заяўку. Такім чынам нават самы патрабавальны пакупнік можа атрымаць тое, што яму патрэбна. Праўда, і цэны на адзенне па індывідуальных заяўках вышэйшыя, чым на "стандартную" лінейку мадэляў. А што да натуральных тканін, то яны выкарыстоўваюцца ў школьным адзенні часцей за ўсё камбінавана са штучнымі. Бо, па словах вытворцаў, касцюмы са 100-працэнтнай воўны нязручныя, за імі складана даглядаць і для гарэз-школьнікаў зусім не практычныя, таму не карыстаюцца попытам у пакупнікоў.
Мінчане рыхтуюць дзяцей да навучальнага года наведваючы не толькі ўнівермагі і кірмашы. Так, у адным з супермаркетаў для дзяцей адзначылі, што сёлета продажы тавараў школьнага сезона амаль у 2,5 раза перавысіў леташні ўзровень. Тут таксама прадстаўлены шырокі выбар канцылярскіх тавараў, абутку і адзення айчынных вытворцаў. У самім супермаркеце нешматлюдна, але я знаходжу маму з сынам, якія выбіраюць школьны касцюм.
— Крама знаходзіцца недалёка ад дому, тут добры выбар тавараў, усё можна купіць у адным месцы, — кажа мама Юлія Ярмолік. — Цэны цяпер паўсюль аднолькавыя: у сярэднім хлапчуковы касцюм каштуе 500 тысяч. Можна знайсці і за 300, але гэта будуць ужо мадэлі мінулага сезона.
...У Стоўбцах на пляцы перад крамай "Дзіцячы свет" выстаўлены павільён, дзе прадстаўлены некаторыя мадэлі адзення, абутку, канцылярскія прыналежнасці. Тут жа — аб'ява пра акцыю з 10-працэнтнай зніжкай, падгонку адзення, зніжку шматдзетным сем'ям — усё, як у сталіцы. Большая ж частка тавараў чакае пакупнікоў унутры крамы.
— У нас столькі цікавых мадэляў! Вось паглядзіце: камплект для сапраўднай модніцы! І гэта натуральная скура — за 195 тысяч! — паказвае спадніцу і камізэльку са скуранымі ўстаўкамі прадавец Таісія Пляскач.
Вядома, выбар тут не такі, як у тым жа ГУМе (меншая гандлёвая плошча), але ён даволі багаты. Мадэлі такія ж самыя, што і ў Мінску, таму ў знешнім выглядзе стаўбцоўскія школьнікі не будуць саступаць сталічным. Самі мясцовыя жыхары асартыментам задаволены.
— Выбар вялікі: і сукенкі, і сарафаны, і спадніцы, і спартыўныя касцюмы. Нікуды не трэба ехаць, — распавядае Вольга, якая збірае ў школу дзвюх пляменніц. — Калі раптам чагосьці няма, падыходзім да прадаўца, яна запісвае заяўку і прывозіць тое, што нам патрэбна. Мы заўжды тут апранаемся.
— Сёння як у Мінску, так і ў райцэнтрах прадстаўлены тавары на самы патрабавальны густ, — падсумаваў вынікі паездкі намеснік міністра гандлю Вячаслаў Драгун. — Магчыма, асартымент нават празмерна шырокі — па 250—270 мадэляў. Вочы разбягаюцца, пакупніку складана зрабіць выбар.
Усяго продаж тавараў да навучальнага года сёлета па краіне вядуць больш за сем тысяч гандлёвых аб'ектаў. З 10 ліпеня да
10 верасня пастаянна дзейнічаюць 200 школьных базараў, арганізавана праца яшчэ 560 дадатковых школьных кірмашоў у выхадныя дні. Коштавы дыяпазон набору тавараў для экіпіроўкі школьніка вагаецца ад 860 тысяч рублёў да 4,3 мільёна рублёў.
Дзіяна СЕРАДЗЮК.
Мінск — Стоўбцы — Мінск.
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.